dimanche 14 février 2021

Wüñopan

Mari mari kom pu chillkatukelu (chillkatuwma zewma?) tüfachi Blog,
Fütra kuyfiy ñi wirintuwepanun, kiñeke tripantu zewma. Fentren züŋu akuy ta ñi moŋen mew, fentrelefuy ñi küzaw, aŀün ṅampülkakefun ka, newe relelafun. Fewla may zoy relelu am küpatun, zuamfun ñi zoy wirintuael faw. Fey mew ramtueymün, chem züŋu chey zuamfuymün nütramkaŋeam fachi Blog mew? Politika züŋu fachiaṅtu mülelu? Pu kuyfike Mapuche ñi azmoŋen ka azmapu chey? Inche ta ñi moŋen fa püle? Kakewme züŋu? Azzüŋun pe nu? Ülzüŋun rume? Küpa kimfun chem ñi pin ta mün rakizuam.

Petu ñi üŋümkülen, elkünuan fachi azentu. Müna ayüwkülen, perpan kiñe ŋillakawe chew ta ñi pepi ŋillakapeyüm mate. Kimnufulmün, feypiaeymün: fütra aŀümapu mülen, Füransü mapu mew. Fa püle rume küzawŋey peam mate. Fewla pepi matetulu am truyuley ñi piwke!
Pewmaŋele wirintukünuaymün nütramkawe mew (minche pakina mew) chem ta mün pin nütramkaŋeam. Lemoria kom pu che, wiriluwkalleael!

7 commentaires:

  1. Kiw wenüy! Inche ta Fernán pingey tañi üy, inche ta Comallo kara ta tüwün ka. Petu kimlan mapuzungun (rume kuzawngey) feymew chewngellele rume, kim mapuzunguan!
    Rupan kiñe tripantu, trokiñ che "Kim Mapuzunguleayiñ" pingelu, pen kiñe nütram "El hombre que hablaba serpiente", inche chillkatufilu tüfachi nütram, mütewe ayüfin! Mañumeyu tami wirintukufiel ta feychi trokiñ che Fb mew.
    Küme antü rulpaleayami! Fey ka wenüy, pewkallal!

    RépondreSupprimer
    Réponses
    1. Mari mari chacha! Rume ayüwkülen ta mi wiripael mew, ka ayüwkülen mi chillkatuel mew tüfachi lifru, müna küme nütram ta niey. Küme anthü rulpaleaymi eymi ka fey! Lemoria!

      Supprimer
  2. Mari mari wenhüy. Iñche chillkatun tami blog. Chaltumay!

    RépondreSupprimer
  3. chumechi akun ta faw cham. kintu kintumeken mapuche wirin fey mu ta akupan tati. Marimari chachay ka mapu müleyiñ, ka mapu chaliwkey ta che akulu we kutxan, femechi müleyiñ, chumafuyiñ kay, müley iñ kuñiwtukunuwael müten, epe konantü müley iñ konael tayiñ ruka mew, mülele yerfa matetuayiñ ka. fey chi werkün zugu pu peñi pu lamgen, newentuael müten,

    RépondreSupprimer
  4. 10-10 peñi! Eymi ta püneken wiridüngun "ll" engu am.

    RépondreSupprimer
  5. Mari Mari! Müne küme dzügu tami blog mew, fentxen mañum tami küdzaw mew, niefiñ kake ramtun welu tüfachi blog llowdzüguenew! Iñche Nva imperial Txaitxaiko waria mülepan ka chillkatumeken mapunchedzügun fey mew ayüwkülefiñ tachi txokiñ, müley taiñ mapudzügutuafiel mütem.. Chalintukueyu peñi, memoria ta füransü mapu püle!

    RépondreSupprimer