"Mapuche Moŋen": Elisa Loŋkon ñi nütram.

Mari mari pu wenhüy.

Chumül Anthü chillkaturpun tüfachi nütram, Elisa Loŋkon ñi wirintükuel. Fey mew ta wirintükupatufin fachi blog mew. Feypi tichi nütram:

^✴(ðuamülmi ta mi chillkatuafiel fey ñi re wirintükuel müten, lelimeŋe minchetu, chew ñi afpuyüm post)

Mapuche Moŋen

« Kuyfi, piam, mülerkelafuy che Nag Mapu mew. Wallon Mapu niefuy meli ñom: Wenu Mapu, Raŋin Wenu Mapu, Nag Mapu ka Minche Mapu. Kallfü püllü eli ñi kümeke püllü ñi nagam Nag Mapu mew, welu weðake püllü ütrirtufi, kewatuyŋün, tranarumeyŋün, kütralürke rupay Nag Mapu mew, puwiŋün Minche Mapu. Pu weðake püllü nhewen nielu am tripatuyŋün, ðegiñürkelewetuyŋün. Kümeke nhewen pepiwüñotulay, Raŋin Wenu Mapu müten puwiŋün, fey mew waŋülhenŋetuy. Rumeñma ŋümalu ñi pepipüranun, lhafkenuwtuy ñi külle mew, femŋechi wefi lhafken.

Kiðulen mew Nag Mapu, Kallfü Wenu Kuðe "amuaymi" pifi ñi püñeñ. Kallfü Wenu Üllcha "trepemapupuaymi Nag Mapu" piŋey. Nag Mapu ti üllcha trekay kurantu mew, mollfüni ñi nhamün, fey mew wefi kachu, rayen, anümka, üñüm. Ñi kiðu miawnuam elŋey Kallfü Wenu We Che. Ti epu we che ñi koñiyewün anümapupay Nag Mapu mew. Kallfü Wenu Kuðe küme ŋülamtufi ti epu che, ñi ŋoymanuam ñi tuwün, ñi mapuðüŋuleael ka ŋillatuleael küme feleam Mapu.

Kultruŋ mew wiriley tüfachi piam, tüfa mew müley ti meli folil küpan, meli troy Mapu, ka meli witran Mapu. »

~ Elisa Loŋkon.

(nentufi að tüfa mew: http://elquejon.deviantart.com/art/Mapuche-272179984)

^✴Re femŋechi wirintükufi ñi nütram ta in lamŋen Elisa Loŋkon:

Mapuce mogen Kuyfi, piam, mvlerkelafuy ce nagmapu mu. Wajonmapu niefuy meli ñom: wenumapu, raginwenumapu, nagmapu ka mincemapu. Kajfu pvjv ebi ñi kümeke püjv ñi nagam nagmapu mu, welu wezake pvjv vxirtufi, kewatuygun, xanarumeygvn, kvxal erke rupay nagmapu mu puwigu mincemapu. Pu wezake pvjv newen nielu am xipatuygvn, degvnerkelewetuygvn. Kvmeke newen pepi wvñotulay raginwenumapu mvten puwigun, feymu wagvlengetuy. Rumeñma gvmalu ñi pepi püranon, bafkehwtuy ñi küje mu, femgeci wefi bafkeh. Kisulen mu nagmapu Kajfuwenu kuse amuaymi pifi ñi pvñen, Kajfuwenu vvjca, xepemapupuaymi nagmapu pigey. Nagmapu ti üjca xekay kurantu mu, mojfvhi ñi nanvn, feymu wefi kacu, rayen, anvmkan, vñvm. Ñi kisu miawnuam elgey Kajfvwenu Wece. Ti epu wece ñi koñiyegvn anvnmapupay nagmapu mu. Kajfuwenu kuce kvme gvlamtufi ti epu ce, ñi goymanuam ñi tuwvn, ñi mapuzuguleal ka gijatuleal kvme feleam mapu. Kulxug mew wiriley tvfaci piam, tvfa mew müley ti meli folil kvpan, mebi xoy mapu, ka mebi wixan mapu.