Fillke Kullin

Ta in peñi Fiestóforo ñimiñkafi ta tüfa, ta in kimtuael fillke kullin ñi üy. Afmatumün :-)

Sumpall

Mari mari kom pu che,
Mütewe ayüfin feychi video, Jauría Films ñi ðewmael, Roxana Miranda Rupaylhaf ñi ülðüŋun mew. Jacqueline Kaniwanh rulpaðüŋuy Roxana ñi ülðüŋun Mapuðüŋun mew; video mew peŋey Ximena Wilipaŋ.

Lelimün, allkütumun, rume ayfiñŋey:

Wünechi Trawün Mapuche Chillkatufe (Primer Congreso de Mapuche Estudiantes)

Mari mari kom pu chillkatufe,

Küpamün wünechi trawün Mapuche chillkatufe mew. Pu Mapuche chillkatufe eŋün pu küðawfe traway fey ñi nütramkawam chumŋechi ñi kimeltuwün Mapuche kimün fachi Anthü. Rume kalewetuy Mapuche aðmoŋen ka aðmapu fewla, welu inchin ta in Mapuche kimün mew wüñoküpaltuayin ta in re Mapucheŋen.

– Chumül am?
Llituay 30/08/2014, 08:00 ñom pürachi Anthü - Afpuay 31/08/2014, 19:00 ñom nagchi Anthü.

– Chew am?
Universidad de la Frontera, rüpü Uruguay #1720, Temuko waria, Wallmapu.

– Küpaamun!
Külikütuŋe faw: https://eventioz.cl/e/primer-congreso-de-mapuche-estudiantes

– Pu Nütramkafe:

• Fernando Waykil
• Rosamel Millamañ
• Mijael Carbone Keypul
• Alberto Wenchumilla Marilaw
• Jorge Kallfükew
• Desiderio Katrükir Kolipaŋ
• Carlos Sepulveda Kayukew
• Sergio Kaniwkew Wirkapaŋ
• Elisa Loŋkon

Epew « Ŋürü am Ñuwa »

Mari mari pu wenh',

Pepun fachi epew Adalberto Salas ñi chillka mew. Adalberto Salas eluleleyew fachi epew Andrés Gallardo. Feychi Andrés Gallardo epewtueyew Antonio Anthülew, 1963 tripantu püle. Feypi:

Teltoŋkülen tripay ñi lolo mew. Ina lhewfü eŋu trawi, “mari mari” piwiŋu. Ŋürü am ñuwa komutufi Willin. Willin am we tripalelu lhewfü mew wilüfküley ñi wentelli.

– “Kurewen awkantuafuyu” piŋey Willin.

– “Iney am malhenŋeay?” –pi Willin– “eymi wüne malhenŋeaymi”.

(Fiestóforo ñimiñkalelenew feychi Ŋüru eŋu Willin nütramkawkülelu. Traeltu, peñi anhay!)

Ŋürü rakiðuami. Ðew rakiðuamlu Ŋürü, “malhenŋean may” pi. Willin rüŋküpürafemi. Ŋürü aymün tronofkoni. “Neŋümŋe ka” piŋey Ŋürü. Pepineŋümlay Ŋürü, lüpeflüpeftumekey müten.

– “Kümentuymi, Ŋürü?” –ramtuŋey Ŋürü.

Ŋürü ðüŋulay, “ümmm” pi müten. Ðew ñiðotuŋelu Ŋürü, Willin rüŋkükonfemtuy lhewfü mew. Weða ayelewey Ŋürü. “Chuman am”, pi ñi rakiðuam Ŋürü. “Weða trewa!”, pi Ŋürü. “Arkümafin tüfachi lhewfü”, pi Ŋürü. Nagi ñi pütukoael. Müchay müten apoy ñi pütra. Lhewfü felekay müten. Itro fill püle pelay kiñe che nu rume. Teltoŋkülen amutuy. Ðew pichi amulu, iweñelŋey Ŋürü. Witray Ŋürü, aðkintuy, pelay che. Ka teltoŋi Ŋürü; ka iweñelŋey.

– “Iney chey” –pi Ŋürü– “kam ta ñi koðo chey”.

Takuy ñi koðo ñi külen mew. Ka amuy, ka iweñelŋey, ka ayetulŋey. Wilki ürke. Chullumnagi ñi piwke Ŋürü.

– “Müna küme iweñimi, Wilki” –pi Ŋürü– “chew ta witralen pünonien kiñe fücha ðüllwi! Nagpaŋe, pichi Wilki” –pi Ŋürü.

– “Ñiðotuŋeymi, Ŋürü” –piŋey.

Tülaŋnagi ñi fücha karü; ñamtuy. Fey mew leta peŋen mew Ŋürü nufnuftuyawkey chew ta ñi mülen ðañe kuram Wilki ta ñi apomafiel ðoy ñi ayetuŋenuael.